領導及職業發展教練

林宇嗰場簡報之後，部門幾個人對佢開始「另眼相看」。 李經理更加直接：「你呢排表現唔錯，下個月轉正機會幾大。」 聽到呢句，林宇當然開心。但開心之餘，佢開始察覺到，有啲氣氛變咗。 小美一向同佢幾friend，但最近開始冷淡，講嘢唔再笑，WhatsApp都只係「已讀不回」。 另一邊，阿強暗暗講：「啲新人而家真係搏命，Presentation都要彩排幾次，唉…我做咁多年都冇咁誇張。」 本來一齊開會嘅時候，阿強主動講笑，今次全程望手機。最明顯嘅係：部門群組裡，佢講嘢唔再有人接。 「點解，我努力咗，反而變得孤立？」林宇問自己。 夜晚，小白出現，慢慢咁講： 「升得快，好易被人覺得你想爬過人哋。」 「但你唔做，又永遠係最底。」 「問題唔係你做唔做，而係你點樣做“人”。」 林宇聽完，開始反思： 過去幾個禮拜，佢太專注做嘢，無咗同事間閒話家常、無咗幫人打下手，連中午一齊食飯都開始Skip。 「係我變咗，只想衝，忘記咗身邊人。」 於是，第二日開始，佢主動做番啲細微事： • 主動問小美：「你啲設計要幫手Check嗎？」 • 幫阿強Cover咗一次排版error，冇講出去 • 食飯時間拉番小組人一齊：「一齊食飯，唔好OT啦。」 幾日之後，小美開始同佢講番笑話，阿強話：「嗱，呢啲先似團隊成員。」 工作能力強，係成功一半；但情商智慧，先係升得穩嘅根基。 林宇明白，升職唔代表你要孤軍作戰，反而更需要溝通、同理、支援。 小白總結：「職場唔係你對世界，而係你同世界一齊行。」 --- 教練視角: • 升職帶嚟人際變化，Coach會幫助你建立情緒覺察力 • 成功後更要管理人際關係，唔係單靠表現 • 同理心、主動關心、低調支持同事係情商智慧一部份 • Coaching會協助案主平衡「表現 vs 關係」

「林宇，下星期一部門例會，你簡單Present吓你做緊個市場推廣活動，好唔好？大約十五分鐘，冇壓力。」 冇壓力？林宇聽完李經理呢句話，心入面已經爆炸咗三次。 「我？Present？部門例會？」 雖然表面笑笑口應承，內心已經出現幾十個「點算點算點算」嘅回音。 返到屋企，佢第一時間打開電腦，但根本坐唔定。腦入面全係畫面：自己講到一半唔記得講咩、觀眾面無表情、自己緊張到口震手震。 「我唔得㗎，我唔係啲口才好嘅人…」 小白浮現：「Present唔係講口才，係講“精準嘅訊息傳遞”。想講得好，就要識拆解三樣嘢。」 「邊三樣？」 小白的Present三式： 1. Purpose（目的)：你講呢場Present，想人記住咩？ 2. Audience（觀眾)：聽你講嘅人，佢哋最關心咩？咩風格先吸引到佢哋？ 3. Structure（結構)：你個故事點樣由頭帶到尾，有冇舉例，有冇重點？ 林宇開始改寫原本死板嘅Slide，唔再用「市場調查結果分析」作為開頭，而係加咗一句：「你知唔知，喺我哋目標顧客入面，有七成係靠網上廣告先知道品牌名？」 佢將成份簡報變成一個有故事、有數據、有重點嘅簡單「小演講」。 然後，小白叫佢試下各種練習： • 每晚企喺鏡前 rehearse • 用手機錄低自己講一次，再聽返 • 搵朋友模擬練習，吸取經驗和意見 練習幾日之後，林宇開始覺得「唔使完美」，只要「訊息清晰」，已經好夠。 星期一例會，十五分鐘內，林宇語速穩定，用三個清晰例子解釋成個活動策略，Slide簡潔有力。 講完嗰一刻，靜咗一秒，然後全場拍掌。 李經理點頭：「Good job，資料講得清楚，邏輯都好清晰。」 林宇笑咗，喺心入面講：「原來演講都唔係咁可怕!」 --- 教練視角: • 教練協助案主發掘Present能力：透過結構、練習、自信建立 • 「目的 – 觀眾 – 結構」係Present三核心 • 情緒管理＋模擬練習係克服緊張關鍵 • Present唔係表演，而係訊息傳遞

「我已經 remind 咗佢三次，但設計稿仲未出！」 林宇趴咗喺部電腦上面，重重咁嘆氣。 項目已經入咗倒數階段，所有流程幾乎準備好，就等設計部出圖。負責人係阿峰，一個外表斯文，做事卻永遠「未搞掂」嘅設計師。 明明上個星期四就講咗 Deadline 係星期一中午，而家已經星期一下午三點，設計稿仍然「處理緊」。 林宇期間的跟進： •  星期五問：「進度 OK 嗎？」 •  星期日再確認：「有冇咩我可以幫？」 •  今朝八點 WhatsApp ：「記得中午前 send 比我。」 但結果仍然係 …… 無聲無息。 小白夜晚出現，開門見山： 「你依家覺得無助，係因為你將項目成功，寄託咗喺一個唔可靠嘅人身上。」 林宇無力笑：「但工作就係要合作㗎嘛，我控制唔到佢出唔出貨。」 「但你控制到你點樣應對。你知唔知有樣嘢叫『 Proactive Accountability 』？」 「係咪即係不停追佢？」 「唔係。係你預早規劃好 “Plan B” 、設定 checkpoint 、定好風險管理。」 第二日，林宇走去搵李經理，講出情況，並提出兩個方案： 1. 阿峰如果中午前未交稿，就改用上次類似活動改編過嘅備用設計稿。 2. 佢會自已喺 Canva 上簡單整個 Placeholder version ，唔會因為對方延誤而影響整體時間表。 李經理望咗佢一眼：「幾好，你開始識得 Plan for reality ，而唔係 Plan for ideal 。」 終於阿峰喺下午五點半前交稿，但林宇唔再因為佢遲咗五個鐘交就失控。佢準備好、應對好、情緒都 Hold 得穩。 --- 教練視角 : •  無法控制他人，但可主動設下應對方案 •  「 Proactive Accountability 」係風險管理、設應急方案嘅關鍵 •  Emotional Management 亦係 coaching 一大範疇：識得 Hold 住自己情緒 •  喺專案中，定期 checkpoint 、及早回報、擬定 Plan B 係成熟工作者表現

「林宇，呢個新產品嘅宣傳試點活動，你全權負責。下星期三我要睇到完整Plan。」 李經理嘅一句話，簡單得嚟，重得好似大山咁。 林宇應承咗之後，先發現手頭上仲有三件日常工作未清，加上而家呢個活動仲要自已寫brief、自已搵設計、自已對供應商、自已整Timeline，乜都要自己嚟！ 佢打開Google Calendar，試圖砌個工作日程表，但寫到一半已經開始頭痛。 「點解時間永遠唔夠？！」佢喃喃自語。 夜晚，小白直接講： 「你呢啲叫做 - 忙而無序。」 林宇癱喺張床：「我試咗排時間，但根本排唔晒。」 「因為你搞錯重點。你以為要管理時間，其實你要管理嘅係“優先順序” 。」 「優先順序？但全部都要做㗎喎！」 「咁你估真係咩都做得晒咩？識做事嘅人，唔係做得快，而係“識邊啲可以唔做，邊啲要做得靚”。」 小白教咗佢一套三步法： 1. 分清「緊急」同「重要」：唔好見deadline就當緊急，要睇清楚邊啲係影響結果嘅關鍵工作。 2. 每日只Focus三件事：每日列出最多三件最關鍵工作，做完就當日完成任務。 3. 用番「番茄鐘法」：一次25分鐘專注做一件事，中間休息5分鐘，每日做4個番茄鐘，效率更高。 翌日返工，林宇跟住新策略行動。 首先將任務拆開：寫Brief、搵設計、對供應商、出預算、對Timeline，每一項都逐一寫低deadline同資源需求。 佢開始先寫Brief，因為無Brief其他人幫唔到手。佢唔急著搵供應商，反而先集中三小時寫好一份清晰Brief，交俾設計部同預算部。 然後佢先開始約供應商，確保對方理解需求。 每做完一件事，佢就打個「√」，越做越有滿足感，唔再係亂咁捱通宵。 一日過一日，時間唔多，但方向清晰。最終星期三早上，林宇自信咁交咗份整齊、完整、連細節都處理到位嘅提案。 李經理睇完，語氣難得有點欣賞：「你今次進步唔少。」 林宇心入面想：「唔係我叻咗，而係我終於識得用方法做嘢。」 --- 教練視角: • Time Management 實際係 Priority Management • Coaching幫助案主拆解任務、釐清焦點、建立節奏感 • 學會唔係咩都做，而係識「選擇性做」

星期一，市場部發生左件事，客戶投訴網站 Banner 廣告連結錯咗，唔係連去產品頁，而係跳咗去公司招聘專頁。雖然只係幾個鐘頭，但已經有幾十個錯誤點擊。 李經理叫咗幾個相關同事入會議室開個「小檢討會」。林宇都係其中一個，因為佢負責整理當時啲素材，但真正負責上載去廣告平台嗰個，係「資深同事」阿 Ken 。 「林宇，你有冇再檢查過啲 link ？」阿 Ken 先開聲。 「我 Check 咗素材格式， URL 係你揀嗰條，我冇改過 … 」 「哦，咁應該係我當時貼錯 link 。不過，你整理資料時其實都應該 Double check 下 … 」阿 Ken 笑笑口，就交番個波去林宇到。 全場靜晒，林宇有啲愕然，又唔想太直接反擊。 會議完咗之後， Yoyo 行埋嚟：「佢成日都係咁，有事即刻『射波』，慣啦。」 林宇：「但我唔想成個組覺得係我冇 Check 清楚 … 」 Yoyo 拍拍佢膊頭：「你要保護自己呀，下次做多一樣野。」 當晚，小白開口： 「你今日學到啲乜嘢？」 「學到『做人唔好太誠實』。」 「唔係唔誠實，而係要學識建立紀錄，做事有交帶。」 「我唔想做到好似信唔過啲同事。」 「保護自己唔代表要傷害對方，只係過程中留有記錄。記住，職場上，口講無憑。」 第二朝開始，林宇開始改變做法。每次處理素材前，佢都會喺 Email 或 WhatsApp 交代清楚： 「以下素材同連結已 Check ， Link 來源根據阿 Ken 6 月 10 日提供文件。」 「如有任何更新，請喺上載前再覆核一次， Thx ！」 而且仲會喺 Notion 入面 Log 埋每個流程負責人嘅名。 一星期後，又有一單 Banner 錯誤事件，但今次唔關林宇事，佢好自然咁拎出紀錄。 李經理只望一眼就講：「阿 Ken ，林宇當時已寫明來源係你， Check 程序都清楚。今次係咩問題？」 阿 Ken 今次唔好意思再推，自己認咗。 事後 Yoyo 暗地豎起拇指：「記錄在案，見招拆招，你都 Level up 啦！」 --- 教練視角 : •  Coaching 協助案主建立邊界與自我保護機制 •  文件紀錄係一種無聲但有效嘅保護方式 •  不需公開衝突，亦可以平衡人情與責任