第八十章：阿強爆粗唔合作？原來我...
星期三朝早，林宇收到第一版視覺草稿時，心入面暗暗鬆一口氣。阿強雖然嘴硬，但手腳一向快，三日內已經交出三套構圖。 但當林宇根據 Marketing 要求，喺圖上面標示出兩三個需要調整嘅地方， email send 咗過去半個鐘之後，阿強就叫咗佢入會議室。 「林宇，你係咪搞錯啊？」阿強語氣凌厲。 「我點搞錯？」 「你改晒我啲嘢，咁點叫我負責？我做 design 咁多年，輪到你話我冇 sense ？ 」 林宇一時間唔識點回應，其他同事靜曬，空氣都好似似凝固咗。 小白當晚語氣嚴肅咁講：「你冇錯，但你嘅方法唔係咁啱。」 林宇：「點解？我只係指出啲調整點，依照需求做修改有咩問題？」 小白：「你知唔知阿強最需要係乜？」 林宇：「自由發揮？」 小白：「唔止，係 “ 被尊重 ” ，唔係因為要改稿咁簡單。」 小白叫林宇睇吓記事簿：「你睇返你啲字，『改一改圖一、刪掉圖二標語、轉色系為品牌主色』，你覺得呢啲句子有對話空間咩？」 林宇呆住：「咁 ... 要點寫？」 小白：「你試下用『你點睇？ 』、『我哋可唔可以一齊諗諗有咩調整方法會保留你個 concept 又配合客戶？ 』咁開頭，仲有，要當面講，唔係 send 三行批評嘅 email 。」 林宇第二日主動搵阿強： 「阿強，我想同你面對面傾返琴日份稿。我唔係想推翻你個概念，其實我好鍾意嗰組配色，係 Marketing 話希望 tone down 少少先符合 campaign 主色。你睇下，有冇可能你再試下保住原意同時做少少調整？」 阿強愣咗一愣，面色軟咗啲：「咁你唔早講。你 send 嗰封 email ，好似全盤否定我。」 林宇認錯：「係我唔小心，下次我會當面講清楚。你肯再諗下第二稿，我好感激。」 阿強點咗頭：「得啦，我今晚再整個版本俾你。」 小白喺林宇收工時講咗一句： 「你改一個人啲稿，唔代表你否定佢。但你唔講清楚，就等於你否定佢。」 待續 ... --- 教練視角 : • 管理唔係下指令，而係建立信任同對話。 • 有時一個『我哋一齊睇睇』比『你改啦』有力量得多。
