領導及職業發展教練

某日朝早，林宇收到Marketing部小美轉過嚟嘅一個簡單任務，「幫手設定活動登記網頁嘅Tracking Code，要同Analytics串好。」 佢接咗，心諗：「呢啲咪就係基本嘢，邊使問人吖。」 但其實……佢只係大概知道Tracking Code係咩，真係點Set、點Test、點驗證，林宇根本未試過。 打開咗後台，跟住上網Google幾篇教學，就開始亂試。搞咗兩粒鐘，網頁冇壞，但數據就無啦啦爆升，變成萬幾個Click。 小美打嚟：「喂，係咪你搞咗個Duplicate Tag呀？點解個Page View Count多左咁多？」 林宇心一沉，佢知自己出事啦。 收線之後，佢係度諗：「點解唔問清楚先做？係咪因為唔想人知我唔識？但而家仲醜…」 啱啱開始浮現負面思想時，小白就出現：「你其實唔係唔識，而係怕認唔識。咁就卡住晒。」 林宇咬咗咬唇：「但問人會唔會顯得我無用？會唔會俾人覺得我咁基本都唔識？」 小白：「問問題唔係示弱，而係主動學習。真正無用，係出事先嚟補救。」 當日下午，林宇主動走去搵咗IT部個阿輝：「可唔可以教我一次點Set Tracking？我做錯咗，想搞清楚流程。」 阿輝望咗佢一眼，冇鬧冇串，反而點頭：「早講麻，呢啲小事，我5分鐘就教得識你。」 原來阿輝自己啱啱入職時都做錯過相同嘅嘢。 5分鐘真係搞掂，仲順便教埋林宇點樣Set UTM code。 過咗兩日，小美又再交新一個類似任務俾林宇，但今次佢唔單止Set得準，仲主動寫咗個簡單SOP俾團隊。 小美笑住講：「林宇，今次你做得好齊，好似個小老師咁。」 林宇自己都忍唔住笑咗：「原來問人唔係一種羞恥，反而係負責任。」 小白靜靜咁講：「真正成長，就係喺你願意開口嘅果一刻開始。」 待續... --- 教練視角: • 唔識唔等於無能，識得問先代表你負責 • 問問題係建立學習心態嘅開始 • 主動認錯與請教，係成熟職場人嘅重要特質 • 學完之後整理返資料，變成「能教人」，真正內化

今次個Project係要為公司夏季活動設計一個全新嘅線上互動平台。HR要負責報名機制、IT要搞平台搭建、Marketing要推廣、Design負責視覺、還有行政部要處理預算。 林宇第一次做跨部門協作，初頭覺得好興奮，因為咁多部門一齊合作，一定會快啲搞掂啦！ 事實證明，佢又天真咗。 第一次開會，五個部門嘅代表坐滿晒會議室，林宇喺側邊望住大家「你一句我一句」，完全唔係講緊同一件事。 Design部話：「我哋想用動畫介面，令活動視覺更吸睛。」 IT就即刻講：「動畫Load得慢，Server要升級，Budget又未批，冇可能。」 HR插咗嘴：「啲報名資料最緊要保密，唔可以玩得咁花巧。」 講到尾，冇人聽人講，就已經否定晒所有Idea。 會議開完，林宇拎住部記事簿出晒神：「咁樣幾時搞得掂…？」 夜晚，小白浮咗出嚟：「你以為人多就快，其實齊人唔代表齊心。每個人都喺度講自己部門嘅需要，但冇人理整體目標係乜。」 林宇撓撓頭：「咁點先可以齊心？」 小白笑：「你要做個中間人，搵出大家嘅共同點。唔使事事攬晒上身，但要有人睇全局。」 第二日再開小組會，林宇喺會前私底下搵咗HR同IT傾，問佢哋底線係乜。之後又搵Design部，話佢哋不如考慮「簡化動畫，轉做圖文互動」咁樣可以快速Load又有視覺效果。 正式開會時，林宇開咗個Google Doc畫晒Timeframe、角色分工，再步步陳述，語氣中立、每個人都聽得明。 「我哋不如咁啦，平台分三段交付，第一階段先上報名頁面同基本介紹，確保HR安全流程搞掂，之後先再加功能。咁IT壓力會細啲，Marketing亦可以開始預熱。」 阿強（IT部）點咗下頭：「咁樣我接受。」 HR阿May亦講：「只要資料收集合規，我冇問題。」 Design部甚至自願講：「我哋可以再改版，配合啲功能加強UX。」 結果，第一次會議後冇共識，但林宇識得喺第二次會議前整合聲音，令大家各退一步，Project總算起步。 小白：「合作唔係靠人多，而係靠有人望得出整體需要、有人肯講埋對家立場。你今日，唔止係Marketing部嘅人，你係連接各個部門的橋。」 待續... --- 教練視角: • 團隊合作唔止係分工，係共識建立與目標對齊 • 中立溝通者角色可以推動跨部門合作 • 有效會前準備有助會議快速對焦 • 聆聽各方需要，提出整體性方案

某個星期三朝早，林宇喺電郵收到阿強傳嚟一段訊息：「你哋 Marketing 搞咩？啲素材改完又改，唔係講咗 Confirm 咗咩？我哋條 Timeline 已經爆緊。」 林宇睇完，心情即刻由晴轉陰：「咁串？做錯啲嘢都唔使咁講我吓？」 原本佢都仲笑住食緊早餐，呢刻杯咖啡都唔覺好飲。 佢火速打開文件想證明自己冇錯，仲打咗條長長嘅回應，但打完又唔敢 Send 出去，怕火上加油。 喺唔知點處理之際，小白跳出嚟：「你以為佢針對你，可能佢根本冇咁諗。」 林宇皺眉：「佢成日口氣咁差，次次好似係我做錯晒咁。」 小白：「人有唔同表達風格，阿強可能係直腸直肚，語氣差，但唔代表佢有惡意。你不如試吓問番佢而唔係即刻反駁。」 林宇深呼吸一口氣，然後回咗一句： 「明白你緊張時間線，唔好意思搞亂咗。你可唔可以幫我指出邊啲素材我哋漏咗？我哋即刻補返上去。」 阿強好快回覆：「主要係 Banner Size 唔啱，啲字又 Cut 咗。我冇時間再同你哋夾，幫幫手啦。」 雖然語氣仍然唔係好 Nice ，但至少講出重點。林宇冷靜下來，再次確認規格之後火速修正，當日黃昏前就送咗新版本俾佢。 傍晚六點幾，阿強竟然主動傳訊息俾林宇： 「啱啱個 Banner OK ， Thanks 。辛苦晒。」 林宇一呆，原來佢都識講多謝。 小白笑住講：「你睇，佢講話直接唔代表真係針對你，可能只係冇時間修飾語氣啫。你唔好聽咗句說話就入晒腦，留意佢背後係咪其實只係焦急、唔識講啫。」 待續 ... --- 教練視角 : •  學懂情緒分離：語氣差 ≠ 惡意 •  提升情緒洞察力，理解溝通背後嘅真實動機 •  在衝突中保持冷靜，以提問代替反擊 •  職場上，唔係所有人都識得「好好講話」

最近 Marketing 要同 Product 部合作出一個新 App 功能推廣，林宇被張經理派咗去跟 Product 部同事阿強開會。 阿強一臉疲倦，一開口就拋咗一堆技術名詞：「 API 仲未整好， UI Flow 要 Update ， Server 仲喺 Testing ， MVP 未到 Final 。」 林宇心入面一沉，完全聽唔明，但又唔想顯得無知，於是硬着頭皮講返啲自己都唔肯定嘅 Marketing 需求，仲扯到好遠講埋之前個 Campaign 數據。 講完成段之後，阿強瞪大對眼：「所以你到底想我哋改邊 part ？」 林宇面紅耳赤，會議氣氛頓時尷尬。 返到自己位，小白就跳咗出嚟：「你頭先講咁多，講中重點未？」 林宇嘆口氣：「我想幫，但唔知點講先得，佢講啲技術嘢我又聽唔明 …… 」 小白點頭：「咁咪要先聽清楚佢講咩先。溝通唔係搶住講，而係等對方講晒，你再問出重點。試下下次只問三樣嘢： 1. 佢想解決咩問題？ 2. 有邊啲限制？ 3. 你可以幫到邊 part ？」 第二日再開會，林宇改變策略，會議入面只問：「咁即係你哋而家最頭痕係邊 part ？如果我哋要出推廣 Post ，邊啲資訊係 Confirm 咗、可以公開？」 阿強望住佢，居然放鬆咗：「其實主要係 UI 定稿未齊，我 Send 張 Mockup 圖俾你哋，出 Post 用啲 Placeholder 先。」 林宇記低咗，再三確認出 Post 時間線、需唔需要 Legal Check 。整個會議十五分鐘內搞掂。 返到公司，張經理笑住話：「林宇，你今次同 Product 部溝通得幾好喎，快狠準。」 林宇忍唔住笑：「原來講得少啲，反而搞得清楚左。」 小白喺佢心入面講：「有效溝通，唔係你講咗幾多，而係你令對方舒服、明白、信你。」 待續 ... --- 教練視角 : •  聆聽比表達更重要，要聽出對方需要 •  精準發問，聚焦於關鍵資訊，減少無效溝通 •  有效溝通係一種互相理解，而非壓倒對方