高管及職涯發展教練

林宇近日工作量激增， project deadline 一個接一個。每日返公司，佢就好似一部無停過嘅機器，不停咁回郵件、寫報告、開會、覆訊息。 個心愈嚟愈急，情緒都好似坐過山車。 「我成日忙到冇時間休息，做嘢又時常唔順，搞到做嘢效率更差，究竟點算？」 佢喺晚飯後，望住手頭一堆未完成嘅工作清單，忍唔住同小白呻。 小白歎咗口氣： 「林宇，你以為時間係搶嚟嘅？時間係要安排嘅。唔係你越忙，越多時間，你心情都要跟得上。」 「試下用『番茄鐘工作法』啦。 40 分鐘專注做一件事，跟住休息 10 分鐘；呢 10 分鐘你唔好睇手機、唔好想工作嘢，可以做啲伸展、飲啲水，甚至聽首輕鬆嘅歌。」 林宇心想：「咁唔係要分開咁多段做，會唔會更慢？」 小白：「剛開始會有啲唔慣，但其實短時間集中精神，會比你長時間拖拉好得多。」 「你試吓，睇下心情節奏，唔係硬搶時間，而係安排心情。」 翌日，林宇試用 40 分鐘專心整理一份企劃案，休息嘅時候就行咗出去飲杯水，伸展吓筋骨。 當日放工，佢感覺意外咁輕鬆，仲未覺得好攰。 隔幾日，張經理見到佢工作狀態變得專注而有條理，讚咗佢一句：「林宇，你依家嘅工作效率同態度真係進步咗好多。」 小白笑住講：「你睇，時間管理唔係搶時間，而係安排心情。」 待續... --- 教練視角: •  時間管理重點係專注力與心情管理，而唔係搶時間 •  利用「番茄鐘」等工具，拆分工作時間與休息時間 •  培養工作與休息節奏，保持身心健康同高效率

林宇又係加班夜，睇住面前條長長嘅報告清單，心入面話：「點解做嘢成日拖拖拉拉？點解一想到要開始就頭痛？」 佢開口同小白講：「我覺得自己根本唔識點開始做，搞到成日推、成日拖。」 小白笑咗一聲：「拖延症唔係因為你懶，而係你唔知點拆開嗰啲大目標，覺得一望到成個山頭就嚇親。」 「試下將一件大事拆成幾個細小嘅步驟，每次只專注做一啲簡單嘅嘢，好似食飯咁，一口一口嚟。」 林宇試咗跟住做，將整份報告拆成 5 個細部份，設定每日完成一部分。 每完成一部分，佢就會俾自己一啲小 reward，例如飲杯好茶，或者聽首歌。 漸漸咁，報告慢慢完成，心情又輕鬆返啲。 小白出聲：「見唔到整個樓梯無所謂，最緊要踏出第一步。」 待續... --- 教練視角: • 拆解大任務，設定細小可行嘅目標 • 建立完成感，透過小獎勵維持動力 • 認識拖延背後嘅恐懼，學習循序漸進

嗰日開會， Marketing Team 討論緊下個月嘅社交媒體 campaign ，阿 Ken 話想搞一條好有趣嘅短片，大家都積極出意見。 林宇心入面有好多想法，但見到阿 Ken 咁有熱誠，佢忍住冇打斷，反而專心聽晒全場嘅意見。 等到大家討論到有啲爭拗嘅時候，林宇用一個好中肯嘅提議化解：「我覺得如果我哋將阿 Ken 嘅創意同小美嘅數據分析結合，可能會好有力度。」 大家一聽，笑咗：「好主意啊，林宇！」 日頭返工嗰陣，張經理搵林宇講：「我見到你今次會議中，唔係爭著講，但提嘅建議好貼切，合作得唔錯。」 林宇心諗：原來唔係要咩都爭住做主角，反而係識得幫人補位，先至係贏。 小白笑住話： 「你睇，有時唔係講得多先係強，而係用心聽，幫其他人發光，自己先會閃。」 林宇點頭：「原來喺團隊，退後一步，可能係我嘅升級秘訣。」 待續... --- 教練視角: •  培養團隊合作與協調能力 •  學習聆聽與適時發聲，避免搶鏡過頭 •  提升情商與溝通技巧，幫助團隊達成共識

一月尾，Marketing Team 交晒年初 campaign draft 。林宇睇住自己做咗四份 proposal ，十幾份 social media content ，數據分析文件唔少過八個 Excel 。 佢暗暗心諗： 「我做咗咁多，點解都仲係 intern ？點解每次做啲出色啲嘅項目都唔會搵我？都係阿 Ken 、小美佔晒光 … 」 放工行返屋企嘅路上，林宇望住街燈，終於忍唔住呻： 「小白，係咪我太廢？點解努力好似冇用咁？」 小白問咗句：「你識唔識種花？」 「我？只識買返嚟插。」 「咁你就唔明啦。真正種花，係你種咗粒種子落泥，日日澆水，冇聲冇氣咁過幾日 … 一個星期都可能冇變化。但你有冇諗過，地下可能已經有根出緊？」 「你而家做緊啲 proposal 、幫人校對文件、幫 support team 出 post ，睇落無乜嘢。但上司睇到你 steady 、信得過；同事知道你做嘢靠得住。」 「只係你未開花，唔代表你無根。」 第二日返到公司，張經理突然行過嚟話： 「林宇，嚟緊 launch 個新產品，要搵人幫手做 launch briefing deck ，我見你上次整理得好好，今次俾你主理個架構，得唔得？」 林宇呆咗兩秒，之後迅速點頭：「得！我會盡快交 draft ！」 佢返到位，第一時間攞返過去幫阿 Ken 執嘅文件做 reference ，原來自己早就學咗唔少嘢，只係未用出嚟。 小白細細聲咁講左一句： 「你唔係突然發光，而係你之前種咗好多光落泥土，而家啱啱冒頭。」 待續... --- 教練視角: •  成果唔係立即出現，努力有時要沉澱 •  對自己嘅 input 建立信心，而唔只睇即時回報 •  工作上細細累積，最終會變成信任、機會、舞台

某日早上，Marketing Team 一開會，小美突然問： 「邊個幫我哋出咗上個 IG post 嘅？圖入錯咗 product code ，今朝有客投訴。」 林宇心口一震：「死啦 …… 應該係我。」 佢低頭講：「係我做嘅，我冇 double check code 。」 全場冇人出聲，小美望住佢冇多講咩，只係話：「下次麻煩 confirm 晒資料先 schedule ，唔緊要，快啲換返佢。」 當晚，林宇坐喺電腦前望住螢幕發呆。 「係咪我太廢？點解啲人對我好似忽冷忽熱咁？」 「係咪因為我唔夠醒目，搞到同事開始覺得我係多餘人？」 小白冇好氣咁話： 「你又嚟啦，又喺度自導自演咁演情緒戲！」 「但係真係冇人講嘢，我唔知自己做得好定唔好。」 「人哋冇講唔代表冇睇住你。」 「你入錯 code ，係錯；但你錯咗會承認，又即刻處理返，呢啲咪就係態度囉。你以為人哋冇講，其實張經理、小美、甚至阿 Ken 全部記住咗你點樣面對錯誤。」 「職場唔似學校，唔會每樣嘢都俾分數。」 「人哋唔會每日同你講你做得幾好，但你每個選擇、反應、處理手法，都默默被人 observe 緊。」 第二日，小美 WhatsApp 咗佢一句： 昨日件事你處理得好冷靜，冇推卸，我 appreciate 嘅。 Keep it up. 林宇望住個訊息，成個人鬆咗一口氣，嘴角竟然忍唔住笑。 同日下午，佢收到張經理搵佢： 「下星期新 intern 入嚟，你之前做得唔錯，我想你帶佢熟手下啲流程。」 林宇呆咗一秒：「我？我邊有經驗帶人？」 「你做嘢有交帶，最緊要有心，呢啲唔係教得嚟。」 小白冇出聲，但林宇腦海浮現出一句話： 「你以為冇人記得，其實人哋一路都有喺度睇住。 」 待續... --- 教練視角: •  建立自我評估意識，但唔走向自我否定 •  職場反饋唔一定明講，但每個行為都會有人觀察、評價 •  培養 resilience （心理彈性）：錯唔可怕，態度決定長遠價值