第七十六章：我開始懷疑自己啱唔啱做呢份工……

最近公司開始轉型，市場部啲同事走咗一半，原有嘅計劃停晒。林宇成日坐喺位望住部電腦，心就飄咗去太空。

「點解我每日都係開會、改PowerPoint、收feedback、再開會……」

有日放工搭車返屋企，佢突然問自己：

「其實，我係咪真係鍾意做呢行？」

林宇入職個時，諗住市場部好型，成日有活動、campaign、同外面嘅agency合作，聽落有創意、有火花。但依家啲工作，就係不斷修改、協調、跟進、救火。

「創意？」佢冷笑一下，「冇budget仲邊有創意？」

佢朋友阿成最近轉行去做UI設計，整app介面，成日喺IG story share自己幾有滿足感。

林宇開始攰、開始疑惑，甚至開始比較。

夜晚臨訓前，佢打開枱燈，攞住個吊嘴。

「小白，老實講，我開始唔知自己喺度做緊咩，連方向都冇，我係咪唔啱做呢行？」

吊嘴閃咗一吓，小白低沉嘅聲音傳出嚟：

「呢個問題，唔係問你『啱唔啱』，而係問你『重唔重視』。」

林宇愣咗：「乜意思？」

「你試吓答我幾個問題。」小白慢慢講：

1. 你覺得做緊而家份工，邊啲moment你最有成就感？ 

2. 邊啲moment你最唔開心，甚至想離職？ 

3. 你喺工作入面，有冇一樣野係你覺得『就算冇人讚你，你都願意繼續做』？ 

林宇開始回想，佢記得自己幫新人小艾搞掂咗份報告，嗰刻佢真係覺得自己幫到人，內心好滿足。

但當要整冇意義嘅週報、被上司不停修改表達方式、開會冇人決策，呢啲moment就會令佢懷疑自己做緊乜。

至於「願意繼續做」，佢諗咗一陣：「我鍾意整資料簡報，指導同幫助其他人。」

「你知唔知，職涯唔係一條直線，唔係直通車，一上車就坐到終點。」小白語氣溫柔。

「有時你中途落車，轉線都唔代表失敗，反而係一種成長。問題係，你要知道你鍾意咩，唔鍾意咩，你嘅“價值觀”係點樣。」

林宇低頭思考，第一次咁認真問自己，我鍾意創作多啲？定係協調同解決問題？我抗拒壓力定係抗拒重複性？我真係唔啱呢行？定係我只係未搵到啱嘅定位？

小白：「每個人職涯入面都會迷失過，關鍵唔係你迷失，而係你有冇勇氣去找答案。」

林宇攞張紙，開始寫低：

•  我擅長：整理資訊、說明重點、幫人理解

•  我唔鍾意：不斷修改、冇明確目標、政治

•  我鍾意：有影響力嘅創作、有意義嘅指導

佢第一次唔係靠人講，而係靠自己寫出來，第一次嘗試了解「自己」。

待續...

---

教練視角:

•  職涯迷失係正常現象，唔代表失敗

•  透過自我覺察，探索個人價值觀與動機

•  寫出內心想法，透過與教練交流，能幫助理清混亂