領導及職業發展教練

「今次會議時間係早上九點半到十點半，討論新季度 KPI 。」 林宇拎住記事簿坐入會議室，隔籬位係 Yoyo ，佢輕聲講：「我哋應該唔洗嚟，呢啲係上層先傾到嘅嘢。」 林宇苦笑：「你講得啱，每次都係開完冇結論，然後再加多個會跟進。」 果然，今次開會如常地冇 Agenda 、冇主持、冇紀錄，大家一陣講 KPI 、一陣又去講人手短缺、再轉去講報銷問題。到最後，李經理話：「好，大家再諗諗，下星期再開一次。」 散會後，林宇返座位，有啲無奈：「成個鐘就咁冇咗。」 小白慢慢浮出嚟：「開會其實唔係壞事，壞係壞喺唔識開。」 「但我唔係主辦人，又控制唔到。」 「控制唔到唔代表做唔到嘢，由你自己開嗰啲會開始改變先。」 機會嚟得好快，幾日後，林宇要主持個 Project Check-in Meeting 。今次佢落足心機準備： 1. 開會前兩日 Send Agenda ，列明三個討論重點 2. 附上每項討論點所需嘅資料連結 3. 明確每人發言時限，總時間控制喺 45 分鐘內 4. 準備一張簡單的 Action Plan 表格，會後即時填寫決議 開會當日，佢準時開始、清晰主持，每講完一點就確認有無共識，記低 To-Do ，唔偏題，唔重複。 Ivan 會後拍咗拍佢膊頭：「你開會開得好清晰呀，啲事項一目了然。」 Yoyo 笑住講：「比張經理啲會仲有效率。」 林宇開完會後冇即刻鬆懈，佢知道高效會議唔只係一場事，而係一個文化。會後十五分鐘內 Send 埋 Meeting Recap ，同 Action Plan 比所有人，並附上一句： 「如果大家有補充或者覺得邊個流程可以再優化，歡迎私訊我。」 小白：「喂，你知唔知其實呢啲就係影響文化嘅開始。」 「一場會？」 「唔係場數，而係你令開會唔再等於浪費時間，大家自然會願意參與。」 林宇笑：「下次我試下影響下李經理。」 --- 教練視角 : •  高效會議依賴事前準備、目標清晰與時間控制 •  Coaching 可培養主持與溝通技巧，幫助提升團隊效率 •  行動紀錄與後續追蹤同樣重要，唔止「講」要有「做」 •  領導力可以由細節開始 —— 連一場小會都可以反映你嘅態度

部門開完每季嘅策略回顧會後，李經理宣布：「有個小項目，要整一份《部門流程優化提案》，唔會指定負責人，大家自組 team ，三星期內完成初稿，呈交上層審核。」 會議室入面一片靜默，冇人郁動。大家都諗緊：「又唔係正式 project ，搞咁多嘢做乜？」 林宇坐喺最後一排，聽到「流程優化」四個字，心入面一震，佢最近先因為流程不清搞到報價文件延遲，真係有感而發。 會後，佢走去搵 Yoyo ：「你對部門啲流程係咪成日覺得有啲位可以再順啲？」 Yoyo 點頭：「啲簽批好慢，啲文件重複又唔統一。」 林宇望住佢：「不如我哋一齊搞呢個 project ，試下搵幾個同事一齊整個提案，唔好就當積累經驗。」 三日內，林宇搵齊咗阿 Jun 、 Yoyo 、小美同 Ivan ，一個細小五人組就咁成立咗。 一開始冇人知應該點開始，林宇提議：「我先試下拉個 Google Form ，大家寫低日常最困擾嘅流程點，再由我整理做成三大主題，之後大家各自負責調研一個，再開會整合。」 冇人反對。佢就開始推動流程：寫收集表、 Send Reminder 、開 Kickoff 、記錄 …… 全部親力親為。 幾個同事由本來只係跟手做，慢慢都主動提意見，主動承擔任務。 兩星期後，草稿完成。佢哋提出咗三項流程改革建議，包括： 1. 文件審批引入自動化流程 2. 建立版本控制機制 3. 每月由部門開一次 10 分鐘 “ 流程痛點分享會 ” 小組將提案交俾李經理。經理睇完話：「估唔到你哋真係整咗個咁具體嘅方案，仲有統計數據。邊個帶頭搞？」 大家都望向林宇。 李經理笑咗笑：「好，林宇，呢次你無名有實，做咗個 Team Leader 。公司需要多啲你咁嘅人。」 林宇有啲尷尬，又有啲欣慰。呢個唔靠權力、只靠影響力推動出嚟嘅小成功，令佢第一次體會到：原來領導，唔一定要上頭話你係 Leader ，係你夠唔夠膽起身話：「我試吓帶頭。」 當晚返屋企，小白懶洋洋地說：「今次幾威呀， Leader 宇。」 林宇冇回嘴，只係笑：「我唔係想威，只係想唔好再有人因為流程亂搞到唔開心。」 「你想令環境變好，咁就已經係一種領導。」 待續 ... --- 教練視角 : •  領導力唔一定來自職位，而係來自主動、影響與責任感 •  ...

呢排林宇開始接手一個 ESG 報告優化項目，要同來自其他部門嘅同事合作。當中一個合作對象，係市場部嘅黃 Sir ，一位係公司做左廿年嘅前輩、有一點「話晒事」嘅感覺。 一開頭，黃 Sir 就話：「喂，其實個報告唔使改得咁複雜，照舊啦，我叫個 Designer 幫你改番個版就得。」 林宇一聽，心裡就知唔妥。因為今次個報告係為咗對接新標準，唔只係改格式，而係要調整內容邏輯、資料表達方式、同埋可讀性指標，唔改內容就根本唔過標。 但對住黃 Sir ，林宇猶豫咗幾秒：「嗯 …… 好，我再睇睇先。」 收工前，小白突然蹦出嚟：「你想唔想做個『講得客氣但唔失原則』嘅人？」 林宇皺眉：「佢都叫我照舊，我唔好得罪人啫。」 「但你退一步，佢當你軟弱。退到最後，咁個報告唔達標，邊個會負責？」 「我囉。」 「咁你知點做喇。」 第二日，林宇主動約黃 Sir 開個 15 分鐘小會，唔喺大場合拎出嚟講，怕佢冇面。會上佢語氣平穩咁講： 「黃 Sir ，其實我哋收到 Compliance 部嘅新要求，報告唔只係視覺更新，而係要符合 GRI 新版本架構。我知你想幫手慳時間，所以我草擬咗一版新版結構同原版對照，想你睇睇邊啲段落可以由你哋補充。」 黃 Sir 望住林宇，面色唔多好：「唔係要搞到咁複雜吓？」 林宇無動搖：「我哋可以喺設計上保留你哋部門想突顯嘅 style ，但內容部分真係要符含新規。否則審核唔過，會返轉頭要大執。」 黃 Sir 冇再講咩，接過文件，點點頭：「你有準備，我睇下先。」 會後，林宇 Send 咗封 Email Recap 整個討論內容，附上 Timeline ，並留下一句：「如你有任何建議，隨時歡迎補充，我哋一齊合作搞好呢份報告。」 呢封 Email 唔單止保留紀錄，仲顯示出佢「唔衝突、唔讓步」嘅溝通技巧。 阿 Jun 事後私下同佢講：「你今日咁處理，好 pro ，我都學到嘢。」 巴士上，小白：「做人唔係要鬥硬，但有底線，先叫有骨氣。」 林宇望住窗外反映自己個樣：「我以為尊重人就係唔講反對，但而家先知，尊重人唔代表冇原則。」 待續 ... --- 教練視角 : •  有效溝通係以尊重為前提，堅守立場為核心 •  Coaching 會協助工作者分清「人際關係」與「專業立場...