第五十章：所謂成長，係你開始唔再咩都等人教

呢個禮拜，林宇忙到個腦都轉唔切。

佢負責一個新產品嘅宣傳推廣企劃，時間緊迫、資源有限，仲要同三個部門夾時間協調進度。以往一有問題，佢第一時間就會搵小白。甚至有幾次，只要佢皺一皺眉，小白就會自動彈出嚟，好似等唔切幫佢分析下一步。

但今次唔同。

星期三凌晨兩點，林宇仲坐喺書枱前，眼神呆滯咁望住電腦畫面上面堆滿咗嘅待辦事項，個腦一片空白：市場部資料未到、人事部嗰邊話唔夠預算、而產品部出咗新要求，成份提案要改。

佢本能想大叫：「小白...幫我諗下啦！」但，講咗一半，佢又停咗。

「唔係次次都靠你，唔係應該自己識處理咩？」

佢拎出紙筆，開始拆件事：

1. 市場部資料延遲 → 追唔追？會唔會有其他替代方案？

2. 預算唔夠 → 嚟緊presentation入面，有冇得用免費資源代替？

3. 產品部改brief → 要改幾多？影唔影響推廣方向？

拆完之後，佢再做咗一個Plan B。雖然簡陋，但至少有個方向。

呢一刻，小白出現，笑住講：「咁耐第一次唔係你叫我，我自己出嚟都覺得感動。」

林宇攤喺凳背，長長嘆咗一口氣：「其實我都知要諗，只係之前總覺得，有你係度就懶少少都無妨。」

「咁而家呢？」小白問。

「而家...我開始知道，真正嘅成長，係唔再等人救你，而係你肯先救自己。」

第二日返公司，林宇主動約咗產品部嘅阿欣開會，重新釐清brief重點。佢仲搵市場部嘅Jason了解有冇替代數據，再喺短時間內用Canva整咗一份簡報交俾上司。

「今次做得幾快手。」李經理淡淡咁講，但眼神裡有幾分欣賞。

林宇心入面微微一笑。

夜晚返到屋企，小白悠悠咁講：「當你開始唔靠我，而係靠自己，代表我完成咗其中一部份任務。」

林宇摸住個吊嘴，冇再感覺依賴，反而多咗一份朋友之間嘅默契。

待續...

---

教練視角:

• 成長唔係學咗幾多，而係你主動開始反思、試行

• 教練是助你能更有效率地成長，不是沒有教練就不懂成長

• 問題分析能力係職場核心能力，越早訓練，越快擁有主動權

• 責任感係職涯進階嘅分水嶺