領導及職業發展教練

「嘩， Yoyo 你又請人食朱古力呀？」 「呢隻好好味，邊度買嘅呀？」 「你個 PPT template 可唔可以 share 埋比我？」 Yoyo 自從上次失誤之後，反而變得更積極，開始主動幫同事執文件、整報表，連設計都整得靚過以前，仲唔知點解，好快就喺人事部、企劃部都識到人，一個星期就入晒大家嘅 group chat 。 林宇睇住佢表現越嚟越成熟，心入面有少少安慰，似乎真係開始融入職場。 但職場從來唔係咁簡單。 「林宇，你而家係咪當我透明？」 阿 Jun 喺 Pantry 食住叉燒飯嗌住佢，語氣唔算粗，但明顯帶火藥味。 「咩意思呀？」 「 Yoyo 都未做夠一個月，你啲 report 、 PPT 已經開始交比佢做。以前你唔係會先問我一聲咩？」 林宇愣咗一秒：「我都諗住你近排轉咗做 UI project ，應該唔駛再做 Market Report… 」 「你係覺得我唔啱做定係想擺明話新仔做得好？」 阿 Jun 一向都係部門裡面人緣唔錯、又經驗豐富嘅骨幹，雖然口多多，但好講義氣，林宇以前都成日搵佢請教。依家竟然因為 Yoyo 嘅出現而令佢有被邊緣化嘅感覺，林宇心裡有啲唔安。 返到位，小白出現： 「職場其中一個最麻煩嘅嘢，就係你做好自己，但人哋會因為你做好而唔舒服。」 「但我真係無心搞到阿 Jun 唔開心 … 」 「無心唔代表無影響。我哋有時要幫人搵返個平衡點，而唔係淨係處理表面嘅問題。」 「你意思係 … 我唔應該一面倒鼓勵 Yoyo ？」 「你可以鼓勵 Yoyo ，但同時要照顧埋原本嘅團隊成員嘅感受。你知唔知點解有時『人緣』好，會引起『內部排斥』？」 林宇皺眉：「因為一啲人會覺得自己地位被取代？」 「 Exactly 。所以做 Leader ，要留意唔止係件事做成點，而係件事做完之後，影響咗邊個、牽動咗邊個情緒。」 第二日，林宇約阿 Jun 一齊去食晏。 「 Jun 哥，我想同你講聲唔好意思，我應該早啲問你對份報告仲有冇興趣再做。唔係想跳過你，只係諗住幫你減輕下工作量。」 阿 Jun 咬住舊叉燒：「我唔係唔想交比人做，只係唔想俾人覺得我冇用。你明唔明？」 「明，明。其實你啲 format 、你教過我點整唔同 market 版塊，我依家都仲用緊。你有冇興趣教埋 Yoyo ？...

「林宇哥 … 對唔住，我真係冇諗過會搞到咁 … 」 Yoyo 企喺茶水間入面，眼紅紅咁拎住紙杯，語氣有啲哽咽。 原來，佢喺幫林宇準備市場分析報告時，唔小心 send 咗一份未 final 嘅版本比咗高層，啲數據有錯，連格式都未齊，搞到李經理喺會議上被問到啞口無言。 林宇知情之後，第一時間去搵 Yoyo 。冇鬧，冇黑面，反而係坐低同佢傾。 「你係咪因為想快啲交差，先冇 check 清楚？」 Yoyo 點頭，手指仲拎住紙杯攪嚟攪去。 「我以為你冇時間睇，我唔想你為咗我再 OT... 」 「咁我問你，依家你最驚咩？」 「我驚李經理覺得我冇用 ... 驚你都唔再信我 … 」 林宇深呼吸，搖搖頭：「 Yoyo ，我冇唔信你。我反而欣賞你敢試，敢攬住個責任。錯嘅係方法，唔係你個人。」 呢句說話好似一劑鎮靜劑，令 Yoyo 稍為定落嚟。 林宇繼續講：「其實錯咗冇問題，反而係之後你點樣學返轉頭最重要。嚟，試下同我一齊拆下件事，下一次點樣可以唔會出現同樣情況？」 Yoyo 呆一呆，然後小聲講：「可能 … 應該先 send 俾你 double check ？」 「嗯，仲有呢？」 「做完報告，我應該標示 version 號碼，唔怕搞亂。」 「 Very good 。你記得得幾快，我都要學你咁。」林宇笑住講，語氣輕鬆咗。 第二日，李經理搵林宇跟進事件。 「你嗰個實習生 … 搞出件咁嘅事，睇嚟你要再 train 多啲啦。」 林宇禮貌點頭：「係，佢出錯，但我都有責任，應該俾多啲指導同 check point 。佢已經知錯，仲主動整番完整版本，我覺得佢可塑性好高。」 李經理冇再多講，只係望咗林宇一眼：「你開始識得撐人啦，不錯。」 夜晚返屋企，小白出聲： 「你今日好似做咗個 coach 嘅角色喎。」 「其實我都驚，驚佢真係受唔住。但話晒我都經歷過出錯嘅時候，如果我冇人教、冇人信，我可能一早唔玩啦。」 小白眨吓眼：「所以你開始明白，教人時，其實係重溫緊自己點樣行過。」 待續 ... --- 教練視角 : •  錯誤係成長過程中重要一環， coach 要營造一個容錯而有責任感嘅環境 •  用教練式問句（如：「你認為可以點樣改善？」）代替批評，令對方由內在反思 •...

「林宇，下星期開始，新入職嘅實習生由你帶住佢一齊做。」 李經理話得好輕鬆，但林宇聽到時個心一震。 「我？我啱啱先轉熟手，點解叫我帶人？」 「你呢半年表現唔錯，係時候試下帶隊同分享經驗。學習管理，唔一定要有title先至起步。」李經理拍一拍佢膊頭，笑住走咗。 星期一早上，一位睇落幾活潑、著住米白恤衫嘅女仔走入部門。 「大家好，我係Yoyo，係呢度實習三個月，請大家多多指教！」 林宇望住佢微笑，但心入面其實暗暗驚青。 Yoyo熱情到有啲反差，第一日就問東問西，跳來跳去，連打印機用法都會問三次。 「林宇哥，呢個係咪咁樣save？」 「林宇哥，你話個brief係咩意思呀？」 「林宇哥，你啲快捷鍵可唔可以教埋我呀？」 林宇笑住答應，但心裡越嚟越繃緊，佢唔係唔想教，但自己啲嘢都忙唔完，邊有時間照顧晒Yoyo嘅要求？ 夜晚返屋企，小白現身： 「你覺得煩，係因為你諗住要做晒啲嘢，做你自己嘅嘢、又做個老師，仲幫佢做埋。」 「咁唔係應該嫁咩？我驚教唔好人。」 「教人唔係每樣都手把手咁教，係要俾對方空間試、錯、再學。你記唔記得你當初都係咁過嚟？」 林宇呆咗一秒，想起初初入公司嗰陣，小美耐心示範報表格式，阿Jun俾佢機會佢參加會議，即使佢唔識做。 「原來...當日佢哋都冇做晒我啲嘢，而係等我試咗，先再糾正我。」 第二日，林宇改變策略。 「Yoyo，你呢張Excel試下根據我教你個邏輯自己整，我下晝幫你睇一次就得。」 「咁我整錯呢？」 「唔緊要，最緊要你試過先知道邊度錯。唔好怕錯。」 Yoyo有啲緊張，但仍然點頭照做。結果下晝交出嘅版本，雖然有啲野漏咗，但整體邏輯清晰，進步顯著。 林宇點頭：「做得唔錯，下次記得呢兩格要補返，已經好好啦。」 Yoyo眼神閃一閃，嘴角上揚：「多謝你！」 嗰一刻，林宇終於明白，領導唔係要樣樣做晒，而係令對方做得好。 小白出現咁講：「你今日冇教佢一樣功能，而係教咗一種態度。」 待續... --- 教練視角: • 領導力唔係管理職位，而係你影響同培育他人的能力 • Coach會引導學員成為帶領者，透過反思學習如何建立信任 • 指導他人唔係一味俾答案，而係創造成長空間 • 新手教新手最容易出現「過度介入」，要學識平衡指導與放手