第三十一章：你以為佢唔理你，其實佢唔識帶你

新Project開始，林宇被調去支援另一個部門嘅項目，由阿邦帶隊。

「份brief喺呢度，今個星期五要有初稿。唔好交啲半生唔熟嘅嘢嚟，明唔明？」邦哥語氣硬邦邦，連眼神都唔望人一下。

林宇望住文件，入面資訊又雜又散，連目標都寫得唔清楚。

「請問…呢個部分係咪想針對大學生市場？」林宇小心翼翼問。

邦哥瞥咗佢一眼：「我已經寫晒，你唔識睇就再睇多次。」

全場靜咗一秒，氣氛急凍。

幾日後，林宇交咗草稿，唔夠五分鐘就被打返轉頭。

「你明唔明咩叫Call to Action？你寫出嚟啲內容，完全唔帶動到人Click入去！你咁樣，點幫到個Project？」

林宇面都紅晒，眼角見到其他同事都唔敢出聲，有啲人甚至望住自己搖頭。

佢心入面開始諗：「係咪我真係咁廢？定係邦哥就係睇我唔順眼？」

夜晚返屋企，林宇煮緊麵，眼神空洞。

林宇苦笑諗:「佢又唔係你上司，你唔使理佢啦。」

小白出聲：「佢唔係針對你。佢係…唔識帶人。」

「唔識帶人？」

「係呀，有啲人升咗職，就自自然然要帶團隊，但其實佢哋冇學過點樣帶人，只係將佢以前受過嘅方式Copy落你度。」

林宇靜咗一陣。

小白又話：「你以為佢嘅情緒係針對你，其實佢喺表達焦慮。因為佢唔知點樣令你Deliver到佢想要嘅嘢。咁不如主動啲，幫佢澄清方向。」

第二日，林宇開會前早少少入房，自己整理咗三個可選擇方案，然後主動講：

「我試咗三種Call to Action版本，呢個係以學生痛點為主，呢個係搞笑式，呢個係比較理性數據型。唔知你覺得邊種方向啱你哋個Team tone？」

邦哥望住佢，微微點咗下頭：「用返第二個，嗰個有啲意思。」

從嗰一刻開始，佢哋嘅合作開始「有人性」咗啲。

嗰日放工，小白話：「你唔需要成日諗住『點解佢咁對我』，試下諗『佢做唔到啲咩』。職場就係咁，你識得解讀上司，遠比你識做嘢重要。」

待續...

---

教練視角:

• 情緒性反應未必代表針對，可能係溝通方式失效

• 有能力做事 ≠ 有能力帶人

• 被批評時，主動澄清目標與方向，重設合作關係

• 解讀領導風格係生存關鍵