第二十八章：老細唔等於領袖，識帶人先係領導

喺公司三個月，林宇已經喺三個唔同部門實習過：Marketing、Project、而家喺HR。

每個部門都有佢嘅主管，但林宇最印象深刻嘅，係項目部經理 - 阿強，人人背後叫佢「硬強」。

「硬強」係嗰種你一見佢就想避開嘅上司。

開會從來唔笑，語氣硬到爆：「你做錯就係你問題」、「我冇時間教你咁多，自己搞掂」。

林宇記得有次因為一條Timeline寫錯咗日子，阿強當住成個部門嘅人面前話佢「連睇都唔睇清楚，仲做乜嘢實習生」。

果一刻林宇真係想即刻辭職，但小白嗰晚只講咗一句：「一個人有幾多權，唔代表佢就有幾多影響力。」

後尾轉咗去HR，張經理反而係另一種人。

張經理唔多講話，但佢每次俾Task，都會講清楚背景同目的，做完之後會話你知邊度做得好、邊度可以改善。

有一日，HR部要喺三日內統計全公司員工健康問卷嘅結果。

林宇估佢會直接派俾阿May或佢自己做，點知張經理問：「你有冇興趣試吓設計簡單Dashboard？」

林宇即刻話：「有！」但心入面驚驚哋。

佢拎住Task搞咗一晚搞唔掂，忍唔住Send咗封Email話：「如果覺得唔OK我可以退返手比May做。」

點知張經理回：「我相信你搞得掂，如果中途卡住，搵我幫手。」

果句「我相信你」成為林宇撐落去嘅理由。

最後佢熬夜整咗份簡單但清晰嘅報表，第二朝交出嚟，張經理無聲望咗佢一眼：「好，有用。」

只係兩個字，但林宇明白咗：「有啲老細會用權力令你服從，有啲領袖，係用信任令你成長。」

嗰晚，小白講咗一番話：

「領導唔係靠聲音大、唔係靠鬧人，而係睇你令唔令到人自發想做好啲嘢。下次你帶團隊，都要記得，俾空間、俾方向，唔好淨係俾壓力。」

待續...

---

教練視角:

• 領導與管理係兩回事

• 真正嘅領袖會提供安全空間讓下屬成長

• 權威可以令你服從，信任先可以令你發揮

• 鼓勵型領導風格更能培養持續學習與責任感