職場篇：隱形合夥人

序: 點解會有呢本小說？

教練服務，從來都唔係一件容易解釋嘅事。佢唔似顧問，比你答案；亦唔似上司，給你指令。佢嘅存在，更多時候係陪你一齊發現：「你真正想要咩？你可以點樣做？」

但呢個過程，如果無親身經歷，或許不易理解。之前我曾在不同平台，嘗試著以不同角度來進行分享，在創作了數百篇短文後，感覺還是差一點。

直到有日，我心諗：「不如寫個故事，可能大家會更易理解和連繫」

就係咁，林宇出現，一個非常普通嘅應屆畢業生，學歷普通、冇特別天賦，喺職場跌跌撞撞，慢慢發現自己想要咩。而呢段路，佢有一個神奇的小夥伴“小白”，一個扮演教練角色嘅小吊嘴，陪佢一齊成長。

這不是一本教你成功法則嘅書，只想透過故事，讓你了解一個職場新人，點樣在教練支持下改變，由內到外。

教練的任務從來都唔係「俾個啱嘅答案你」，而係幫你搵到屬於你嘅問題同選擇。

希望你喺故事入面，會搵到屬於你，能啟發你的一句話。 

---

第一章：畢業後第一個清晨

我記得好清楚，嗰朝係六月中，天氣未算好熱，但我個心好煩躁。

畢業典禮完咗冇幾耐，我一個人攤喺屋企梳化，望住天花板，隔離嘅窗簾微微飄動。呀媽去咗街市，屋企靜得只有自己嘅呼吸聲同風扇嘅聲。

明明話大學畢業係人生里程碑，點解我咁空虛呢？啱啱考完 final，影完畢業相，WhatsApp group 靜晒，朋友圈都冇人再講返學。

我打開手機，LinkedIn彈出嚟：「你有3個新職位建議」，全部都寫住：需1年經驗、需流利英語、需識Power BI。我連Excel都未學識晒……

我開始喺心入面問自己：
「我係咪真係咁差？連一份工都搵唔到？」



啱啱諗到一半，電話响咗。我唔想聽，但係好奇，望一望畫面，係爸爸個名。

我接咗，佢冇講太多，只係話：
「喺你枱面，有件畢業禮物，係我早幾日留低嘅。唔值錢，係我細個時你爺爺比我嘅，陪我走過成長中好多唔知點行嘅階段。」

我起身去書枱，打開櫃桶，入面有個布袋，輕輕咁一搖，有啲聲。

拎出嚟睇，係一個細細地、黑色吊嘴，有啲舊，可能係佢以前帶開嘅。

我摸吓佢，冇咩特別。
但突然，吊嘴震咗一震。

跟住，有把聲好細、好似來自腦入面：
「你終於發現我啦。」

我成個人震一震，望吓四周：
「邊個講嘢？」

聲音再出現：「係我，小白。唔好驚，我唔係鬼。我只係…你人生路上嘅一個小幫手。」

我愣住咗，真係愣咗好耐。腦入面一片空白，成件事唔合理得滯。

但唔知點解，我冇扔低佢，反而問咗句：
「你識唔識搵工？」

佢笑：「我唔識搵工，但識幫你諗清楚，點樣唔好咁快放棄。」

嗰一刻，我第一次覺得，可能我唔洗一個人去面對這條未知的職涯之路。

待續...